2025-12-16
Энергияны бөлүштүрүү сабагынын алкагында студенттер долбоорлорду даярдашты
Кыргыз-Түрк «Манас» университетинин Инженердик факультетинин Электр-электроника инженериясы бөлүмүнүн окутуучусу доц. д-р Руслан Акпаралиев жүргүзгөн Энергияны бөлүштүрүү сабагынын алкагында 2025-жылдын декабрь айында студенттер долбоордук иштерди аткарышты.
Сабактын жүрүшүндө студенттер электр энергиясын бөлүштүрүү системаларынын түзүлүшү, бөлүштүрүү тармактарындагы натыйжалуулук, энергия жоготууларын талдоо, жүктөрдү бөлүштүрүү, тармактын ишенимдүүлүгү жана заманбап энергияны бөлүштүрүү ыкмалары сыяктуу темалар боюнча долбоорлорду иштеп чыгышты. Теориялык билимди практикага айкалыштырууну максат кылган бул иштер студенттерге реалдуу инженердик маселелерге чечим табуу мүмкүнчүлүгүн берди.
Долбоорлор топтук иштин негизинде даярдалып, техникалык отчеттор жазылып, жыйынтыктар аудиторияда презентация түрүндө сунушталды. Бул процесс студенттердин аналитикалык ой жүгүртүүсүн, инженердик эсептөөлөрдү жүргүзүү жөндөмүн жана презентациялык көндүмдөрүн өнүктүрүүгө өбөлгө түздү.
Доцент д-р Руслан Акпаралиев долбоордук окутуунун студенттердин кесиптик даярдыгына олуттуу салым кошорун белгилеп, мындай ыкма инженердик билим берүүдө туруктуу жана терең үйрөнүүгө шарт түзөрүн баса белгиледи.
Кыргыз-Түрк «Манас» университети колдонмого багытталган сабактар жана долбоордук окутуу аркылуу энергетика жана электр инженериясы багытында атаандаштыкка жөндөмдүү адистерди даярдоону улантууда.
