2026-07-14
Табигый илимдер факультетинин салымы менен Эл аралык физика олимпиадасында тарыхый ийгилик
Табигый илимдер факультети тарабынан Эл аралык физика олимпиадасына даярдоо максатында уюштурулган практикалык лабораториялык сабактар окуучулардын 56-Эл аралык физика олимпиадасында (IPhO 2026) жетишкен чоң ийгиликтери менен жыйынтыкталды.
Өнөктөштөрүбүздүн бири болгон «Маариф» билим берүү комплексинин директорлугунун расмий кайрылуусунун негизинде, «Маариф» билим берүү комплекси жана «Газпром Кыргызстан» мектебинин окуучулары Айтегин Эмилбеков, Темирхан Салиев, Тутушбаев Умар, Марсель Касымов жана Нурбол Мырзабеков үчүн 2026-жылдын 8–12-июнь күндөрү Табигый илимдер факультетинин физика лабораториясында интенсивдүү практикалык окуу программасы өткөрүлдү.
Окуучуларды Эл аралык физика олимпиадасынын эксперименттик (практикалык) бөлүгүнө даярдоо максатында уюштурулган сабактарды Табигый илимдер факультетинин окутуучусу, ф.-м.и.к., доцент Тамара Карашева, ошондой эле академиялык адистер Азат Акматбекова жана Назгүл Аданбаева өткөрүштү. Сабактардын жүрүшүндө окуучулар лабораториялык жабдуулар менен иштөөнү өздөштүрүп, ар түрдүү физикалык тажрыйбаларды аткарышты, эксперименттик маселелерди чечүү көндүмдөрүн өркүндөтүштү жана олимпиаданын форматына ылайык практикалык тапшырмаларды аткарышты.
Бул даярдык процессинен кийин окуучулар 2026-жылдын 4–12-июль күндөрү Колумбиянын Букараманга шаарында өткөн 56-Эл аралык физика олимпиадасында (IPhO 2026) Кыргызстандын улуттук курама командасынын курамында ийгиликтүү катышышты.
Олимпиаданын жыйынтыгында курама команданын бардык беш мүчөсү сыйлыкка татыктуу болушту. Алардын ичинен факультетте өткөрүлгөн даярдык сабактарына катышкан окуучулар төмөнкүдөй жыйынтык көрсөтүштү:
- Темирхан Салиев («Газпром Кыргызстан» мектеби) – күмүш медаль
- Айтегин Эмилбеков («Газпром Кыргызстан» мектеби) – коло медаль
- Нурбол Мырзабеков («Маариф» билим берүү комплекси) – ардактуу диплом
Ошондой эле курама команданын башка мүчөлөрү Аскар Абдиев (AIMS Раззаков эл аралык мектеби) жана Ахмед Абылаев («Сейтек-STEM» мектеби) коло медаль жеңип алышты. Натыйжада Кыргызстан олимпиаданы 1 күмүш, 3 коло медаль жана 1 ардактуу диплом менен жыйынтыктады.
Билим берүү министрлигинин маалыматына ылайык, Темирхан Салиевдин күмүш медалы Кыргызстан үчүн Эл аралык физика олимпиадасында 19 жылдан кийинки алгачкы күмүш медаль болду. Буга чейинки күмүш медалды 2007-жылы Максим Степаненко жеңип алган. Ошентип, Темирхан Салиев Кыргызстандын Эл аралык физика олимпиадасынын тарыхындагы үчүнчү күмүш медалдын ээси болду.
Табигый илимдер факультети катары окуучулардын бул сыймыктуу ийгилигине чоң салым кошкон ф.-м.и.к., доцент Тамара Карашевага, Азат Акматбековага жана Назгүл Аданбаевага терең ыраазычылык билдиребиз. Ошондой эле өлкөбүздү татыктуу деңгээлде тааныткан окуучуларды жана алардын машыктыруучуларын чын жүрөктөн куттуктап, мындан аркы ийгиликтерди каалайбыз.
