МХП төрага орун басары, профессор Ильяс Топсакал «Манас» университетине келди
МХП төрага орун басары жана Самсун депутаты профессор Ильяс Топсакал Кыргыз-Түрк «Манас» университетине келип, ректор профессор Алпаслан Жейлан жана университеттин жетекчилиги менен жолугушту.
Кыргыз-Түрк «Манас» университетинде өткөн жолугушууга ректор профессор Алпаслан Жейландан сырткары, биринчи проректор доц. Алмаз Ибраев, проректорлор профессор Исмет Алтынташ, профессор Камалбек Карымшаков жана башкы катчы доц. Фатих Рамазан Истанбуллугил катышты.
Жолугушууда жогорку билим берүү, Түрк дүйнөсүндөгү билим берүү жана маданий кызматташтык, жаштардын бирдиктүү билим берүү чөйрөсүндө тарбияланышы жана «Манас» университетинин бул тармактагы орду тууралуу пикир алышуулар болду.
«“Манас” университети — Түрк дүйнөсүнүн маданий түпбелгилери сакталган маанилүү борбор»
Профессор Ильяс Топсакал жогорку билим берүү Түрк дүйнөсүнүн ортосундагы мамилелерди өнүктүрүүдө маанилүү тармак экенин белгилеп, Кыргыз-Түрк «Манас» университети бул жагынан өзгөчө орунга ээ экенин билдирди.
«Манас» университети Түркия, Кыргызстан жана башка Түрк дүйнөсү өлкөлөрүнөн келген жаштарды бир билим берүү чөйрөсүндө бириктирип жатканына көңүл бурган Топсакал, университет жөн гана жогорку окуу жайы болбостон, ошондой эле орток маданий баалуулуктар сакталган борбор экенин айтты.
Топсакал: «Чындыгында, Түрк дүйнөсүндө маданий түпбелгилердин жана маданий дүйнөнүн негизги ээси — “Манас” университети», — деп баалап, университеттин өнүгүп жатканына кубанычта экенин билдирди.
«Манас» университетинде эмгектенген окутуучулардын илимий иштери менен катар Түрк дүйнөсүнүн ортосундагы мамилелерди чыңдоого да салым кошуп жатканын белгилеген Топсакал, ректор профессор Алпаслан Жейлан баш болгон университет жетекчилигине, окутуучуларына жана кызматкерлерине ыраазычылык билдирди.
«Өз тилибизде илимий өндүрүштү жана жаратмандыкты жогорулатуу маанилүү»
Сөзүндө тил менен билим берүүнүн байланышына да токтолгон Топсакал, «Манас» университети түрк жана кыргыз тилдери бирге колдонулган билим берүү модели менен маанилүү милдетти аткарып жатканын айтты.
Топсакал жогорку билим берүүдө өз тилинде илимий эмгектерди көбөйтүү оригиналдуу ой-пикирлердин жана эмгектердин жаралышы үчүн чоң мааниге ээ экенин белгилеп, университеттер даяр маалыматты гана өткөрүп бербестен, өзүнүн илимий жана маданий тажрыйбасы аркылуу жаңы идеяларды жараткан мекеме болушу керектигин айтты.
«Манас» университети бул өзгөчөлүгү менен Кыргызстан, Түркия жана Түрк дүйнөсүнөн келген жаштардын бирдиктүү академикалык чөйрөдө болуусуна шарт түзөрүн белгилеген Топсакал, университеттин илимий өндүрүш менен маданий байланыштарды чыңдаган түзүмүнө көңүл бурду.
«Түрк дүйнөсүнүн ортосундагы бирдик биргелешкен өндүрүш жана бир туугандык негизинде өнүгүүдө»
Түрк мамлекеттери уюмунун алкагындагы мамилелер да бааланган жолугушууда Топсакал Түрк дүйнөсүндөгү бирдик биргелешкен өндүрүш, өз ара кызматташтык жана бир туугандык мамилелердин негизинде өнүктүрүлүшү керектигин билдирди.
Топсакал Түрк дүйнөсү өлкөлөрүнүн өз ара мамилелеринен сырткары коңшу өлкөлөр менен да жакшы мамиледе болуусу маанилүү экенин айтып, Түрк дүйнөсүндөгү кызматташтык биргелешкен долбоорлор жана өз ара пайдалуу негизде илгерилеп жатканын белгиледи.
«Манас» университети да бул түшүнүктүн билим берүү жана маданият тармагындагы маанилүү мекемелеринин бири экенин айткан Топсакал, университеттин түрдүү өлкөлөрдөн келген студенттерди бир чатыр астында окуусу келечек үчүн чоң мааниге ээ экенин баса белгиледи.
Ректор Жейлан: «“Манас” университети орток билим берүү жана маданият багытын чыңдоону улантууда»
КТМУнун ректору профессор Алпаслан Жейлан болсо сапар үчүн ыраазычылык билдирип, «Манас» университети Түркия менен Кыргызстандын ортосундагы билим берүү, илим жана маданият тармагындагы кызматташтыктын маанилүү мекемелеринин бири экенин белгиледи.
Жейлан университеттин Түрк дүйнөсүнүн жаштарын бирдиктүү академикалык чөйрөдө бириктирген түзүмү «Манас» университети түптөлгөндөн берки негизги миссиясынын маанилүү бөлүгү болуп саналарын билдирди.
«Манас» университети окуу-тарбия иштери менен катар илимий-изилдөө, маданий иш-чаралар жана эл аралык академиялык кызматташтыктар аркылуу өнүгүүнү улантып жатканын айткан Жейлан, университеттин биргелешкен баалуулуктар негизиндеги билим берүү түшүнүгү келечекте да чыңдалып улантыларын айтты.
