Жаңылыктар

Кыргыз-Түрк "Манас" университетинин Үзгүлтүксүз билим берүү борбору тарабынан Курманжан Датка атындагы көркөм сүрөт галереясында уюштурулган “Түймө жана тигүү көргөзмөсүнүн” ачылышы көпчүлүктүн катышуусунда өттү. Кол өнөрчүлүк маданиятын сактоо, чыгармачылыкты колдоо жана кесиптик көндүмдөрдү өнүктүрүү максатын көздөгөн иш-чара көрүүчүлөрдүн чоң кызыгуусун жаратты.

КТМУнун Тарых бөлүмүнүн окутуучусу, профессор Незахат Жейландын колдоосу менен Үзгүлтүксүз билим берүү борборунун алкагында университеттин академиялык жана административдик кызматкерлеринин жубайларына арналган 8 жумалык (48 сааттык) окуу программасы уюштурулуп, кол эмгегин искусство менен айкалыштырган мазмундуу билим берүү процессине айланды. Программанын жүрүшүндө катышуучулар түймө, тигүү жана дизайн багыттарында салттуу кол өнөрчүлүктү өздөштүрүү менен катар аны заманбап ыкмалар аркылуу чыгармачылык менен өнүктүрүүгө мүмкүнчүлүк алышты.

Окууну ийгиликтүү аяктаган курстун катышуучулары тарабынан даярдалган өзгөчө түймө эмгектери, көрктүү тигүү үлгүлөрү, декоративдик буюмдар жана чыгармачыл мода жасалгалары көргөзмөгө коюлду. Салттуу кол өнөрчүлүктүн маданий мурасын заманбап эстетика менен айкалыштырган эмгектер аялдардын эмгегинин өндүрүшкө жана искусствого айланган таасирдүү көрүнүшү катары өзгөчө көңүл бурдурду. Аярлык менен даярдалган эмгектер катышуучулардын эстетикалык табитин, кол чеберчилигин жана окуу процессинде жетишкен өсүшүн айкын көрсөттү.

Ректор Жейлан: “Аялдардын өндүрүшкө кошкон салымы – коомдук өнүгүүнүн негизги ачкычы”

Программада ректор, профессор Алпаслан Жейлан "Манас" университетинде бекем үй-бүлөлүк маданият калыптанганын белгилеп, биримдик жана тилектештик руху бул иш-чарада өзгөчө сезилгенин айтты. Аялдар коомдун жана үй-бүлөнүн негизги тиреги экенин баса белгилеген профессор Жейлан, аялдардын эмгегинин өндүрүшкө, искусствого жана билим берүүгө айланышы коомдук өнүгүү үчүн чоң мааниге ээ экенин билдирди.

«Аялдардын өндүрүшкө кошкон салымы – коомдук өнүгүүнүн негизги ачкычы», – деген ректор социалдык жана кесиптик билим берүү иш-чаралары адамдардын өзүнө болгон ишенимин арттырып, чыгармачылыгын өнүктүрүп, университет ичиндеги тилектештик маданиятын бекемдей турганын кошумчалады.

“Ар бир жашка, ар бир максатка билим” урааны менен өмүр бою билим алууга салым

КТМУнун Үзгүлтүксүз билим берүү борборунун жетекчиси, профессор Южел Өксүз «Ар бир жашка, ар бир максатка билим» урааны менен уюштурулуп жаткан семинарлар менен курстар адамдардын өмүр бою билим алуу процессине чоң салым кошуп жатканын белгиледи.

Түстүү дефиле программасы коноктордун жогорку баасына ээ болду

Иш-чаранын алкагында катышуучулар кол эмгеги менен даярдаган буюмдардын көрсөтмө программасы да уюштурулду. Түймө үлгүлөрү жана тигүү курсунда даярдалган кийимдер көрсөтүлгөн дефиле көрсөтүүсүндө катышуучулардын чыгармачылыгын жана эмгегин чагылдырган өзгөчө эмгектер сахнада көрүүчүлөрдүн сынына сунушталды. Түркүн түстүү көрүнүштөргө бай болгон программа коноктор тарабынан кызыгуу менен кабыл алынып, кол өнөрчүлүктүн эстетикалык жана маданий баалуулугу дагы бир ирет даңазаланды.

Программанын соңунда 8 жумалык (48 сааттык) тигүү курсун ийгиликтүү аяктаган курстун катышуучуларына сертификаттар тапшырылды.