Жаңылыктар

Европа Биримдиги тарабынан колдоого алынган MANAS E-LAB долбоорунун жана Erasmus+ CBHE программасынын алкагында Кыргызстандын жогорку окуу жайларында туруктуу ишкердик экосистемасын түзүүгө багытталган окутуу программасы Кыргыз-Түрк “Манас” университетинин окутуучулары жана административдик кызматкерлери үчүн уюштурулду.

Кыргыз-Түрк “Манас” университетинин базасында өткөн окутуу программасы өлкөдөгү жогорку окуу жайларда ишкердик жана инновация маданиятын өнүктүрүүгө көмөк көрсөтүүнү, ошондой эле окутуучулар менен административдик кызматкерлердин ишкердик жаатындагы билимин жана көндүмдөрүн жогорулатууну максат кылды.

Эки күнгө созулган окутууга Кыргыз-Түрк “Манас” университетинин окутуучулары жана административдик кызматкерлери менен катар Чыгармачыл индустриялар ассоциациясынын, TOBB Экономика жана технология университетинин, Инновация борбору мамлекеттик мекемесинин жана Нарын мамлекеттик университетинин окутуучулары менен адистери катышты.

«MANAS E-LAB» долбоору менен ишкердик боюнча билим берүү чыңдалууда

Окутуу программасынын ачылышында КТМУнун проректору жана Экономика жана башкаруу факультетинин деканы, профессор Камалбек Карымшаков MANAS E-LAB долбоору Кыргыз-Түрк “Манас” университети үчүн гана эмес, Кыргызстандын жогорку билим берүү системасы үчүн да маанилүү демилге экенин белгиледи.

Ал долбоордун алкагында ишкердикке багытталган жаңы сабактарды окуу программасына киргизүү пландалып жатканын айтып, бул сабактар студенттердин жаңычыл жана чыгармачыл инсан болуп калыптанышына өбөлгө түзөрүн билдирди. Ошондой эле ишкердик боюнча билим берүү студенттердин кесиптик өнүгүүсүнө көмөк көрсөтүп, өлкөдөгү ишкердик экосистемасынын бекемделишине салым кошорун белгиледи.

«Ишкердик – бардык тармактарды бириктирген компетенттүүлүк»

Экономика жана башкаруу факультетинин Бизнес башкаруу бөлүмүнүн башчысы, профессор Гөкхан Өзер бүгүнкү күндө ишкердик экономика жана бизнес тармактары менен гана чектелбестен, инженериядан тартып социалдык илимдерге чейин көптөгөн багыттар үчүн маанилүү компетенттүүлүккө айланганын айтты.

Анын айтымында, ишкердик маданиятынын өнүгүшү жаңы идеялардын, инновациялык долбоорлордун жана ийгиликтүү ишкердик демилгелеринин жаралышына өбөлгө түзөт.

10 сессияда ишкердиктин ар кыл багыттары талкууланды

Окутуунун биринчи күнү MANAS E-LAB долбоорунун координатору, доцент Азамат Максүдүнов катышуучуларга долбоордун максаттары жана негизги иш-чаралары тууралуу маалымат берди.

Ал долбоордун жогорку окуу жайларда ишкердик экосистемасын түзүүдөгү маанисине токтолуп, ишкердиктин экономикалык өнүгүү жана туруктуу өсүш үчүн өзгөчө мааниге ээ экенин белгиледи.

Жалпысынан 10 сессиядан турган окутуу программасында университет менен бизнес дүйнөсүнүн кызматташуусу, ишкердик экосистемалары, ишкердик компетенциялары, студенттик стартаптарга насаатчылык көрсөтүү, ишкердик боюнча окуу программаларын жаңылоо жана аймактык университеттердин тажрыйбалары сыяктуу темалар каралды.

Сабактарды Кыргыз-Түрк “Манас” университетинин, TOBB Экономика жана технология университетинин, Чыгармачыл индустриялар ассоциациясынын, Инновация борбору мамлекеттик мекемесинин жана Нарын мамлекеттик университетинин тажрыйбалуу окутуучулары менен адистери офлайн жана онлайн форматта өткөрүштү.

Катышуучулар теориялык билим менен катар ар түрдүү мекемелердин ишкердик жаатындагы практикалык тажрыйбалары менен да таанышууга мүмкүнчүлүк алышты. Ошондой эле суроо-жооп жана талкуу бөлүмдөрүндө катышуучулардын сунуш-пикирлери угулуп, жогорку окуу жайларда ишкердик маданиятын өнүктүрүү боюнча пикир алмашуу жүргүзүлдү.

MANAS E-LAB окутуу программасы ийгиликтүү аяктады

Окутуунун соңунда өткөрүлгөн жыйынтыктоочу жыйында программа ийгиликтүү аяктаганы белгиленди.

Жыйында MANAS E-LAB долбоорунун алкагында жетишилген жыйынтыктар талданып, анын Кыргызстандын жогорку окуу жайларындагы ишкердик экосистемасын өнүктүрүүгө кошо турган салымы белгиленди.

Программа аяктагандан кийин окутууга катышкан окутуучуларга жана административдик кызматкерлерге катышуу сертификаттары тапшырылды.