Айымдарга арналган Рамазан панели
Факультетибиздин 2026-жылдагы социалдык жоопкерчилик иш-чараларынын алкагында 2026-жылдын 16-февралында айымдарга арналган «Рамазан панели» өткөрүлдү. Панелдин координатору КТМУнун Теология факультетинин кызматкери Жамила Жораева, ал эми панелдин модератору профессор, доктор Незахат Жейлан болду. Панелдин баяндамачылары болуп доктор Миргүл Бекмурзаева, доктор Дилноза Рахматиллаева жана изилдөөчү-окутуучу Алтынай Курманбекова катышты.
Панелде алгач Рамазан айынын руханий мааниси жана анын адамдын ички дүйнөсүнө тийгизген таасири тууралуу сөз болду. Орозо ибадатынын сабырдуулукка, боорукерликке жана напсини тарбиялоого тийгизген таасири талкууланды. Ошондой эле Рамазан айынын коомдогу тилектештик, өз ара жардамдашуу жана бөлүшүү маданиятын бекемдөөдөгү орду баса белгиленди. Мындан тышкары, бүгүнкү күндө Рамазандын жаштарга жана үй-бүлөлүк жашоого тийгизген таасири каралды. Панель орозонун жөн гана ачка болуу эмес, адеп-ахлактык өнүгүү жана руханий жаңылануу мүмкүнчүлүгү экендиги тууралуу жыйынтык менен аяктады.
Панелдин соңунда катышуучуларга сый тамак берилди. Иш-чарага болжол менен 300 айым катышып, чоң кызыгуу менен угушту.
