Жаңылыктар

Кыргыз-Түрк "Манас" университетинин Медицина факультетинин студенттери уюштурулган онлайн жолугушууда Түркия жана Кыргызстандан жогорку деңгээлдеги академиялык жетекчилер менен жолугушту. Жолугушууда студентке багытталган билим берүү, медициналык окутуунун сапаты, окуу программаларынын шайкештиги жана эл аралык кызматташтык маселелери кеңири талкууланды.

Программага КТМУнун ректору, профессор Алпаслан Жейлан, ошондой эле Саламаттык сактоо илимдери университетинин ректору, профессор Кемалеттин Айдын,  негиздөөчү ректору Жевдет Эрдөл жана Аксарай университетинин ректору, профессор Алпай Арыбаш катышты.

Теңир-Тоолордун этегинде шайкештик, өнүгүү жана күчтүү билим берүү чөйрөсү

КТМУнун ректору, профессор Алпаслан Жейлан Түркиядан келип, билим алып жаткан студенттер кыска убакытта университеттик жашоого ийгиликтүү көнүп кеткенин белгиледи. Ал академиялык процесс сабактар менен гана чектелбестен, студенттер жаңы маданий жана социалдык чөйрөгө да ыңгайлашарын баса белгиледи.

Студенттердин кыргыз тилин үйрөнө башташы алардын жашап жаткан аймакка жана маданий чөйрөгө терең интеграцияланууга умтулуусун көрсөтөрүн айтты. Бул көрүнүш университеттин көп маданияттуу жана бириктирүүчү билим берүү саясатынын маанилүү чагылдырылышы болуп саналат.

Жейлан студенттердин академиялык жетишкендиктери жана коомдук турмушка активдүү катышуусу менен айырмаланып жатканын белгилеп, алардын кыска убакытта кампус жашоосунун активдүү бөлүгүнө айланганын кошумчалады.

Ал: «Студенттер бул жерде жөн гана билим албай, тууган элдин арасында жаңы жашоо тажрыйбасына ээ болуп жатышат. Теңир-Тоолордун этегиндеги бул билим сапары алардын кесиптик жана жеке өнүгүүсү үчүн абдан маанилүү», – деди.

Ошондой эле университет жетекчилиги студенттердин сапаттуу билим алышы, жашоо шарты, өзүн коопсуз жана баалуу сезүүсү үчүн бардык шарттарды түзүүгө аракет кылып жатканын белгиледи.

Окуу программасы Түркия менен шайкеш келтирилди

Саламаттык сактоо илимдери университетинир ректору, профессор Кемалеттин Айдын студенттер менен түз байланыштын маанисин белгилеп, мындай жолугушуулар билим берүү процессин жакшыртууга көмөк көрсөтөрүн айтты. Ал КТМУ менен кызматташтыктын алкагында медицина факультетинин окуу программасы Түркиядагы 14 медицина факультети менен шайкеш келтирилгенин билдирди.

Бул шайкештик студенттерге Түркиядагы курдаштары менен тең деңгээлде билим алууга шарт түзөрүн кошумчалады.

Келечектеги дарыгерлерге күчтүү колдоо

Аксарай университетинин ректору, профессор Алпай Арыбаш студенттерге ийгилик каалап, бул билим берүү процесси алардын кесиптик өнүгүүсү үчүн чоң мүмкүнчүлүк экенин айтты.

Ал эми Саламаттык сактоо илимдери университетинин негиздөөчү ректору Жевдет Эрдөл КТМУнун Медицина факультетинин жетишкен деңгээлин узак жылдар бою жүргүзүлгөн эмгектин жана кызматташтыктын жыйынтыгы катары баалады. Ал бул жерде билим алган студенттер кесиптик жана адамдык сапаттары жогору дарыгерлер болуп чыгарына ишеним билдирди.

Студенттердин канааттануусу

Жолугушуу учурунда студенттер өздөрүн кызыктырган суроолорду түздөн-түз жетекчилерге берүүгө мүмкүнчүлүк алышты. Алар КТМУда билим алып жаткандарына ыраазы экендиктерин билдиришти.