Улуу памирдик кыргыз жаштарынын Манас университетине болгон сапары
Вандын Улуу Памир айылында жашаган кыргыз жаштарынан турган топ Кыргызстанга болгон программасынын алкагында Кыргыз-Түрк «Манас» университетинде (КТМУ) болуп, ректор Алпаслан Жейлан менен жолугушту. «Жаш Кеңеш» билим берүү жана маданият коому тарабынан ишке ашырылып жаткан маданий долбоордун алкагында өткөрүлгөн бул жолугушууда жаштардын Кыргызстан менен маданий байланыштарын чыңдоо, билим берүү мүмкүнчүлүктөрү жана Улуу Памирге багытталган келечектеги долбоорлор талкууланды.
Жаштарга өзгөчө көңүл бурган ректор Алпаслан Жейлан Улуу Памир кыргыздары Түркия менен Кыргызстандын ортосундагы тарыхый жана маданий байланыштардын уникалдуу үлгүлөрүнүн бири экенин белгиледи. Улуу Памирден келген жаштар эки өлкө менен тең бекем байланыш кура алган жаңы муунду чагылдырарын айткан профессор Жейлан бул байланышты билим берүү жана маданият аркылуу келечек муундарга өткөрүп берүүнүн маанилүүлүгүнө көңүл бурду.
«Манас» университети — Улуу Памир жаштары үчүн билим берүү көпүрөсү
Жолугушууда КТМУнун Түркия менен Кыргызстандын ортосундагы билим берүү, илим жана маданият тармактарындагы ээлеген ордуна токтолгон ректор, профессор Алпаслан Жейлан университет Түрк дүйнөсүнүн ар кайсы аймактарындагы жаштар менен байланышты өнүктүрүүгө чоң маани берерин баса белгиледи.
Улуу Памир жаштары Манас университетин өз университети катары көрүшүн каалаган профессор Алпаслан Жейлан аларды келечектеги билим алуу жолунда КТМУ сунуштаган мүмкүнчүлүктөрдү пайдаланууга чакырды. Ар кайсы өлкөлөрдөн жана маданий чөйрөлөрдөн келген студенттерди бириктирген университеттин эл аралык академиялык түзүмүнө көңүл бурган Жейлан КТМУ орток тарых жана маданият менен азыктанган жаш муундардын ортосунда жаңы байланыштардын түзүлүшүнө шарт түзгөн маанилүү жолугушуу экенин билдирди.
Профессор Алпаслан Жейлан Улуу Памир жаштары менен курула турган мамилени узак мөөнөттүү билим берүү жана маданий алакага айландыруу маанилүү экенин айтып, университет бул багыттагы кызматташууларга ачык экенин кошумчалады.
Улуу Памирге багытталган билим берүү тармагындагы кызматташтык чыңдалат
Жолугушууда ошондой эле Улуу Памирде жашаган жаштарга багытталган билим берүү иштерин өнүктүрүү маселеси да талкууланды. Пландалган долбоорлор аркылуу Улуу Памирдеги жаштардын билим алуусун колдоо, алардын кыргыз тили жана маданияты менен байланышын чыңдоо жана КТМУ менен туруктуу байланыш түзүү максат кылынууда. Учурдагы маданий карым-катнашты билим берүүгө негизделген жана узак мөөнөттүү институционалдык кызматташтык алкагына айландыруу пландалууда.
Маданий мурас келечек муундар менен жашайт
Ректор, профессор Алпаслан Жейлан улуу памирлик жаштардын ата журтка саякат кылуусуна мүмкүнчүлүк түзгөн долбоорду ишке ашырууга көрсөткөн колдоосу үчүн Түрк кызматташтык жана координация агенттигинин (ТIКА) төрагасы Абдуллах Эренге ыраазычылык билдирди.
КТМУ Түрк дүйнөсүнүн орток маданий мурасын сактоого жана аны келечек муундарга өткөрүп берүүгө салымын кошкон иштерге өзгөчө маани берерин айткан профессор Жейлан билим берүү, маданият жана жаштар тармагында жаңы долбоорлорду иштеп чыгууну колдоону уланта турганын билдирди.
Ата-Журт менен болгон байланыш маданият жана тил аркылуу чыңдалууда
2021-жылы Ванда негизделген «Жаш Кеңеш» билим берүү жана маданият коому Улуу Памирде жашаган кыргыз жаштарынын билим алуусуна, маданий жана социалдык жактан өнүгүүсүнө багытталган иштерди жүргүзүп келет. Курамында 15 кишилик бий тобу да орун алган коом жаштардын кыргыз маданиятын таануусуна, салттуу баалуулуктарды жана маданий таандык сезимин чыңдоого багытталган иш-чараларды өткөрүп келет. Программанын алкагында жаштар Ысык-Көл, Жети-Өгүз, Каракол, Арашан, Чолпон-Ата, Ата-Бейит жана Ала-Арча баш болгон Кыргызстандын тарыхый, маданий жана жаратылыш мурасын чагылдырган маанилүү жерлерди кыдырышты.
