Жаңылыктар

Кыргыз-Түрк “Манас” университетинин (КТМУ) Табигый илимдер факультетинин деканы профессор, доктор Гүлбүбү Курманбекова илим жана академия жаатындагы эмгектери, ошондой эле Кыргызстандын билим берүү жана илим тармагына кошкон салымы үчүн Кыргыз Республикасынын маанилүү мамлекеттик сыйлыктарынын бири болгон “Даңк” ордени менен сыйланды.

Кыргыз Республикасынын Президенти Садыр Жапаров тарабынан тапшырылган орден Курманбекованын көп жылдар бою жүргүзүп келген академиялык ишмердигине жана илимге кошкон салымына мамлекеттик деңгээлде берилген жогорку баанын көрсөткүчү болду.

Илимий эмгекке мамлекеттик деңгээлде баа берилди

КТМУнун жыйындар залында өткөн иш-чарада ректор, профессор, доктор Алпаслан Жейлан жана биринчи проректор, саясий и.к., доцент Алмаз Ибраев профессор, доктор Гүлбүбү Курманбекованы сыйлыгы менен куттукташты.

Курманбекованын илимий эмгектери менен катар академиялык тажрыйбаны жаңы муундарга өткөрүп берүүгө жана университеттин билим берүү жана изилдөө миссиясына кошкон салымына токтолгон Ректор Жейлан жетишилген ийгилик КТМУнун үй-бүлөсү үчүн да кубанычтуу окуя экенин белгиледи.

Жейлан: “Окумуштууларыбыздын көп жылдык академиялык эмгегине жана өлкөнүн илимий жашоосуна кошкон салымына ушундай маанилүү мамлекеттик сыйлык менен баа берилишин биз абдан жогору баалайбыз. Гүлбүбү Курманбекова эжекебизди чын жүрөктөн куттуктайм. Бул маанилүү сыйлык жаңы илимий изилдөөлөргө жана жаңы ийгиликтерге күчтүү дем берет деп ишенем”, – деди.

Академиялык ийгилик КТМУнун үй-бүлөсү үчүн сыймык болду

Университеттердин илимий потенциалы алардын курамында эмгектенген жана даярдалган окумуштуулардын жүргүзгөн изилдөөлөрү менен өнүгөрүнө көңүл бурган Жейлан академиктердин улуттук жана эл аралык деңгээлде жетишкен ийгиликтери КТМУнун илимий тажрыйбасына жана академиялык таанымалдыгына да салым кошорун белгиледи.

КТМУнун биринчи проректору, саясий илимдеринин кандидаты, доцент Алмаз Ибраев Курманбекованы куттуктап, илим жана билим берүү тармагында көп жылдар бою жүргүзүлгөн эмгектердин мамлекеттик деңгээлде бааланышы академиялык коомчулук үчүн маанилүү экенин билдирди.

“Даңк” ордени деген эмне жана кимдерге берилет?

Кыргыз тилиндеги “Даңк” сөзү “атак-даңк, сый-урмат, аброй” деген маанилерди билдирет. “Даңк” ордени Кыргыз Республикасынын мыйзамдары менен белгиленген мамлекеттик сыйлыктардын бири болуп саналат жана өлкөгө ар түрдүү тармактарда олуттуу кызмат жана салым кошкон адамдарга берилет.

Бул орденге Кыргызстандын социалдык-экономикалык өнүгүүсүнө жана элдин бакубатчылыгына салым кошкондор, ошондой эле илим, билим берүү жана саламаттыкты сактоо тармактарында маанилүү эмгек сиңиргендер, мамлекеттик жана коомдук турмушка салым кошкондор, улуттук маданиятты, искусствону жана тарыхты сактоого жана өнүктүрүүгө кызмат кылгандар, ошондой эле спорттун өнүгүшүнө салым кошкондор татыктуу боло алышат.

Ордендин дизайны да анын маанисин чагылдырат. Күмүштөн жасалган сегиз кырдуу жылдыз формасындагы ордендин борборунда алтын жалатылган лавр жалбырактары жана арча бутактарынан түзүлгөн гүлчамбар жайгашкан. Расмий түшүндүрмөгө ылайык, лавр жалбырактары атак-даңкты жана абройду, ал эми арча түбөлүктүүлүктү билдирет. Борборунда “Даңк” деген жазуу орун алган орденде кыргыздын улуттук оймо-чиймелерине да орун берилген.